உலக பொருளாதாரத்தில் புதிய அலை – “Climateflation” எனப்படும் விலை உயர்வு

உலகம் தற்போது புதிய பொருளாதார யுகத்தில் நுழைந்து வருகிறது. இனி விலைகள் வெறும் நுகர்வோர் தேவை அல்லது மத்திய வங்கியின் தீர்மானங்களால் மட்டுமே தீர்மானிக்கப்படுவதில்லை. மாறாக, பூமியின் சூழ்நிலைமாறுதல்களே விலைகளை மேலே தள்ளத் தொடங்கியுள்ளன.

அதிகரிக்கும் வெப்பநிலை, கடும் காலநிலை மாற்றங்கள், கடல் மட்ட உயர்வு, நீண்டகால வறட்சி ஆகியவை உணவு உற்பத்தி, போக்குவரத்து, ஆற்றல் வலையமைப்புகள் ஆகியவற்றை பாதிக்கின்றன. இதன் விளைவாக அறுவடைகள் குறைகின்றன, விநியோகச் சங்கிலிகள் தடுமாறுகின்றன, மின்வலையமைப்புகள் சிரமத்துக்கு உள்ளாகின்றன. அமைதியாக, ஆனால் இடையறாது, “காலநிலை” நம் வாழ்வுக் கட்டணத்தையே மறுபரிசீலனை செய்கிறது. இதனை நிபுணர்கள் “Climateflation” என அழைக்கின்றனர்.

“Climateflation” என்றால் என்ன?

பாரம்பரிய பணவீக்கத்தில் (Inflation), விலையேற்றம் பெரும்பாலும் தேவையின்மை, ஊதிய உயர்வு அல்லது நாணயக் கொள்கை மாற்றங்களால் உருவாகிறது. ஆனால் “Climateflation” என்பது இயற்கைச் சீர்குலைவால் ஏற்படுகிறது. பயிர்கள் தோல்வியடைகின்றன, நீர் தட்டுப்பாடு அதிகரிக்கிறது, அடிப்படை கட்டமைப்புகள் சேதமடைகின்றன. 100-க்கும் மேற்பட்ட நாடுகள் தொடர்பான ஆய்வொன்றின் படி, காலநிலை அதிர்ச்சிகள் வருடந்தோறும் உலகளாவிய உணவுப் பொருள் விலையேற்றத்தில் 1.5 முதல் 1.8 சதவீத புள்ளிகளை கூட்டுகின்றன. இந்த போக்கு தொடர்ந்தால், 2035-க்குள் அது 3 சதவீத புள்ளிகள் வரை உயரக்கூடும். உணவைத் தாண்டியும், மொத்த பணவீக்கம் வருடந்தோறும் கூடுதல் 1 சதவீத புள்ளியளவு உயரும் அபாயம் காணப்படுகிறது.

அதிகம் பாதிக்கப்படுபவர்கள்

இந்த இடையூறுகள் இனி தாற்காலிகமல்ல. அவை அடிக்கடி, கடுமையாக, ஆண்டு தோறும் ஒன்றோடொன்று மோதிக்கொண்டே வருகின்றன.

• விளிம்பு நாடுகள், குறிப்பாக விசுவ வட்டார நாடுகள், அதிகம் பாதிக்கப்படுகின்றன. சிறிய அளவிலான வெப்பநிலை கூடுதலே பயிர்ச்செறிவு மற்றும் தொழிலாளர் உற்பத்தித்திறனை குறைத்து விலைகளை உயர்த்துகிறது.

• வளர்ந்த நாடுகள் நேரடி வேளாண் பாதிப்பிலிருந்து ஓரளவு பாதுகாப்பில் இருந்தாலும், இறக்குமதி செய்யும் உணவு மற்றும் பொருட்களின் விலை உயர்வால் பாதிக்கப்படுகின்றன.

• தெற்கு உலக நாடுகள் (Global South) ஏற்கெனவே வறுமை, கடன் சுமை, உணவுக் குறைபாடு போன்ற பிரச்சினைகளுடன் போராடிக் கொண்டிருக்கின்றன; இங்கு climateflation மிகக் கடுமையான தாக்கங்களை ஏற்படுத்துகிறது.

தெற்காசியாவின் நிலை

தெற்காசியா உலகின் மிகவும் பாதிப்பு அடையும் பிராந்தியங்களில் ஒன்றாகும். பருவமழை மழைக்கு அதிகம் சார்ந்திருப்பதும், வறுமை விகிதங்கள் அதிகமாக இருப்பதும் இதற்குக் காரணம்.

• பங்களாதேஷ் – கடல் மட்ட உயர்வு, மழை மாறுபாடு காரணமாக நிலங்களில் உப்புத்தன்மை அதிகரித்து அரிசி விளைச்சல் குறைந்து விலை உயர்ந்துள்ளது.

• இந்தியா – 2023 இல் பல மாநிலங்களில் பருவமழை பலவீனமாக இருந்து அரிசி உற்பத்தி 20% வரை குறைந்தது. அரசு ஏற்றுமதியைத் தடை செய்தது, இது உலக சந்தையை அதிர்ச்சிக்குள்ளாக்கியது.

• பாகிஸ்தான் – 2022 வெள்ளத்தில் நான்கு மில்லியன் ஏக்கர் விவசாய நிலம் அழிந்தது. பல ஆண்டுகள் கடந்தும் கோதுமை, சீனி போன்ற அடிப்படை உணவுகளின் விலை அதிகரித்தபடியே உள்ளது.

• இலங்கை – 2022 இல் கடன் நெருக்கடி, நாணய நெருக்கடி ஆகியவற்றோடு இணைந்து உணவுப் பணவீக்கம் 95% வரை உயர்ந்தது. 2024-க்குள் மொத்த பணவீக்கம் 1.4% ஆகக் குறைந்திருந்தாலும், உணவுப் பொருட்களின் விலை 5–6% உயர்வில் நிலைத்துவிட்டது. 2023 இல் எல்-நீனோ தாக்கத்தால் பருவமழை தாமதமாகி நீர்த்தேக்கங்கள் வழக்கத்தை விட 40% மட்டுமே நிரம்பின. இதனால் விவசாயிகள் மிகுந்த பாதிப்புக்குள்ளானார்கள்.

உலகளாவிய விளைவுகள்

• வெப்பநிலை உயர்வால் வேளாண் விளைச்சலும் தொழிலாளர் உற்பத்தித்திறனும் குறைகின்றன.

• மழை, வெள்ளம், புயல் போன்ற இயற்கை பேரிடர்கள் கட்டமைப்புகளையும் விநியோகச் சங்கிலிகளையும் சேதப்படுத்துகின்றன.

• உணவு விலைகள் உயர்வது வறுமையை அதிகரிக்கும்; சில நாடுகளில் சமூக கலவரம், எதிர்ப்புகள், அரசியல் குழப்பங்களுக்கும் வழிவகுக்கிறது.

• வங்கிகள், காப்புறுதி, சந்தைகள் ஆகியவை பாதிக்கப்படுகின்றன. பேரிடர் இழப்பீடு அதிகரிப்பதும், சொத்து மதிப்புகள் சரிவதும், கடன் தவறுதல்கள் அதிகரிப்பதும் நிதி அமைப்புகளைச் சிதைக்கக்கூடும்.

• சுகாதாரம் பாதிக்கப்படும். குழந்தைகளில் ஊட்டச்சத்து குறைபாடு, நகரங்களில் வெப்ப அலைகள் காரணமாக மின் நெருக்கடி, அதிக மின்சாரச் செலவுகள் என மக்கள் வாழ்க்கைச் செலவுகள் மேலும் உயரும்.

• குடியேற்றம் அதிகரிக்கலாம். விவசாயிகள் வாழ்வாதாரம் இழந்து நகரங்களுக்கும் அண்டை நாடுகளுக்கும் இடம்பெயர வேண்டிய சூழல் உருவாகலாம்.

அபாயகரமான சுற்று

Climateflation என்பது ஒரு “தற்காலிக பிரச்சினை” அல்ல, அது ஒரு கட்டமைப்பு பிரச்சினையாக மாறிவருகிறது.

1. காலநிலை அதிர்ச்சி → விலை உயர்வு.

2. விலை உயர்வு → மீட்பு மந்தம்.

3. மீட்பு மந்தம் → தழுவல் நடவடிக்கைகளுக்கு முதலீடு செய்ய இயலாமை.

4. தழுவல் நடவடிக்கைகள் இல்லாமை → அடுத்த அதிர்ச்சிக்கு மீண்டும் பலவீனம்.

இவ்வாறு ஒரு தானே தன்னை வலுப்படுத்தும் சுழற்சி உருவாகிறது.

கேள்வி

இந்த சூழ்நிலையில் முக்கியமான கேள்வி எழுகிறது:
“Climateflation தனது பிடியை இறுக்கிக் கொண்டிருக்கையில், எந்த நாட்டின் பொருளாதாரம் இந்தச் சுழற்சியிலிருந்து தப்பிக்க வல்லமையோ நேரமோ பெறும்? அல்லது, நாம் ஏற்கனவே திரும்ப முடியாத கட்டத்தை எட்டியிருக்கிறோமா?”